Argentinada prezident və parlament seçkilərində səsvermə başlayıb

Apgentinada prezident və parlament seçkilərində səsvermə başlayıb.

APA-nın xəbərinə görə, yerli vaxtda saat 08.00-da açılan seçki məntəqələri saat 18.00-da bağlanacaq.

Prezident postu uğrunda 5 namizəd mübarizə aparır. Ali kürsü uğrunda əsas mübarizə iqtisadiyyat naziri hakim "Vətən Naminə İttifaq” koalisiyasının namizədi Sergio Massa, "Dəyişiklik naminə Birlikdə” adlanan ən böyük müxalif koalisiyanın namizədi, sabiq təhlükəsizlik naziri Patrisiya Bulriç və Azadlıq İrəli Alyansına daxil olan Libertar Partiyasına rəhbərlik edən deputat Xavier Miley arasında gedəcək. Hazırkı Prezident Alberto Fernandes hələ apreldə növbəti seçkilərdə iştirak etməyəcəyini bəyan edib. Namizədlərin hər hansı birinin ilk turda qalib gəlməsi üçün ən azı 45 faiz səs, yaxud ən yaxın rəqibindən 10 faiz çox olmaqla 40 faiz səs toplamaq tələb olunur.

 

Əgər namizədlərdən hər hansı biri bu nəticəni əldə etməzsə, noyabrın 19-da prezident seçkilərinin ikinci turu keçiriləcək.