Qəzzada həlak olan media işçilərinin sayı açıqlanıb

"İsrail hücumları nəticəsində 25 fələstinli jurnalist və 13 media işçisi həyatını itirib. Ən az 35 jurnalstin evi bombardman edilib. İsrail sistemli siyasət yeridərək fələstinli jurnalistləri hədəf alır. 2000-ci ildən oktyabrın 7-dək 55 fələstinli jurnalist öldürülüb”, - Fələstin Jurnalistlər Birliyinin "Facebook” səhifəsində edilən açıqlamada bildirlib.

Həmkarlar ittifaqı bu hücumlarda həyat yoldaşı və iki uşağı şəhid olan Əl-Cəzirə telekanalının əməkdaşı jurnalist Vail Dahduhun evinin bombalanmasının məqsədyönlü olduğuna diqqət çəkib.

 

Oktyabrın 30-da Qəzza hökuməti məlumat yayaraq həlak olan jurnalistlərinin sayının 35 nəfərə çatdığını deyib.

 

Oktyabrın 23-də Jurnalistləri Müdafiə Komitəsi açıqlama verərək həyatını itirən jurnalistlərin sayının artaraq 23 nəfər olduğunu, onlardan 19-nun Fələstinli, 3-nün İsrailli, 1-nin Livanlı olduğu  və hücumların başladığı gündən bu yana isə  8 jurnalistin yaralandığı bildirilib.

 

Oktyabrın 11-də Jurnalistləri Beynəlxalq Müdafiə Komitəsi HƏMAS İsrailə hücuma başladıqdan sonra Qəzza zolağında azı 7 fələstinli jurnalist həlak olduğunu qeyd edib.

Oktyabrın 7-də HƏMAS İsrailə bir neçə min raket atıb və Əl-Əqsa Daşqını əməliyyatının başladığını elan edib.
 
Bunun fonunda İsrailin milli təhlükəsizlik naziri İtamar Ben-Qvir oktyabrın 7-də ölkədə fövqəladə vəziyyət elan edib.

İsrailin baş naziri Netanyahu ölkənin müharibə vəziyyətində olduğunu bəyan edib. İsrail ordusunun HƏMAS-a qarşı əməliyyatı "Dəmir qılınclar” adlandırıb.