İran səfiri Ermənistana gizli silah satılması ilə bağlı müqavilənin olduğunu inkar edib

İranın Ermənistandakı fövqəladə və səlahiyyətli səfiri Mehdi Sobhani Ermənistanla İran arasında 500 milyon dollar dəyərində gizli silah müqaviləsi bağlanması ilə bağlı məlumatları təkzib edib.

"İran İnternational” Ermənistanın İranla 500 milyon dollarlıq silah almaq üçün müqavilə imzaladığını yazmışdı. Nəşrin yazdığına görə, Ermənistan müəyyən edilmiş məbləğdə bəzi növ pilotsuz uçuş aparatları və zenit-raket kompleksləri almalıdır.

Bundan əvvəl Ermənistan Respublikasının Müdafiə Nazirliyi İrandan silah alınmasına dair müqavilənin imzalanmasının dərc olunmasına cavab verib və xəbəri təkzib edib.

İranın "Mehr” agentliyi ilə söhbətində Sobhani həmin nəşrləri "İranın region ölkələri ilə dostluq münasibətlərinə xələl gətirmək cəhdi” adlandırıb.

Onun sözlərinə görə, bu cür mesajlar İranla bağlı saxta xəbərlərin və qərəzli təhlillərin mənbəyinə çevrilmiş etibarsız media tərəfindən yayılır.


www.anews.az