Rusiya Avropa Şurasının Milli Azlıqların Müdafiəsi Konvensiyasından çıxıb

Rusiyada Avropa Şurasının Milli Azlıqların Müdafiəsi üzrə Çərçivə Konvensiyası avqustun 1-də fəaliyyətini dayandırıb. Bu barədə ölkənin Xarici İşlər Nazirliyinin rəsmi məlumatı hüquqi informasiya saytında yerləşdirilib.

Sənəd 1996-cı ilin fevralında Strasburqda imzalanıb. Ötən ilin sentyabrında Rusiya prezidenti Vladimir Putin Dövlət Dumasına konvensiyanın denonsasiyasını təklif edən federal qanun layihəsi təqdim edib.

Qərara əsas kimi qeyd olunub ki, Avropa Şurası Nazirlər Komitəsinin 27 sentyabr 2022-ci il tarixli qətnaməsi müqavilənin iştirakçısı olan dövlətlər tərəfindən icrasına nəzarət üzrə Məşvərət Komitəsində rusiyalı ekspertin səlahiyyətlərini əhəmiyyətli dərəcədə məhdudlaşdırıb. Oktyabrda dövlət başçısı müvafiq qanunu imzalayıb.

Konvensiya etnik qrupların ayrı-seçkilikdən qorunması üçün ümumi məqsəd və prinsipləri ehtiva edir. Bunlara mədəniyyətin, dinin, dilin və adət-ənənələrin qorunub saxlanmasının təşviqi, ifadə azadlığının təmin edilməsi, azlıqların iqtisadi, mədəni və sosial həyatda iştirakı, məcburi assimilyasiyanın qadağan edilməsi daxildir.

Avropa Şurası 1949-cu ildə əsası qoyulmuş qitənin ən qədim hökumətlərarası təşkilatıdır. İnsan hüquqları və demokratik inkişaf sahəsində əməkdaşlıq etmək məqsədi daşıyır. Rusiya 1996-cı ildə Avropa Şurasına üzv olub.


www.anews.az