Navalnı ölümündən qabaq əziyyətlərə məruz qalıb

Rusiyalı jurnalistlər İK-6 koloniyası əməkdaşlarının yazışmalarını əldə edərək müəyyənləşdiribər ki, koloniyada dünyasını dəyiçən müxalifətçi  siyasətçi Aleksey Navalnıya qəsdən dözülməz şərait yaradılıb.  Bu məlumatlar 2024-cü ilin avqustunda Meduza nəşrinə anonim mənbə tərəfindən ötürülüb.

Məktublardan məlum olur ki, İK-6 koloniyasının əməkdaşı İlya Kruqlyşev Navalnının ağır şəraitdə saxlanması üçün qurulan sistemin təşkilində əsas rol oynayıb.

O, siyasətçinin şübhəli bəhanələrlə dəfələrlə cəza təcridxanasına salınması üçün sənədlər hazırlayıb. Navalnı İK-6-da olduğu müddətdə ümumilikdə 300 gündən çox karserdə saxlanılıb və bu müddətdə ona lazım olan tibbi preparatlar sistematik olaraq verilməyib.

İK-6 əməkdaşlarının yazışmalarında həmçinin Navalnıya qarşı sərt tədbirlərin zəruriliyinə dair sübutların saxtalaşdırılmasına cəhdlər aşkar edilib.

Məsələn, bir hadisədə siyasətçinin gündəlik rejimə zidd olaraq gəzinti hüququndan məhrum edildiyi zaman bir neçə sənəd versiyası müzakirə edilib.

Koloniya administrasiyası Navalnının xarici ünsiyyətinə, o cümlədən ailəsi ilə yazışmalarına və telefon zənglərinə də yaxından nəzarət edib. İK-6 əməkdaşları xüsusilə Navalnının həbsxanadan sosial şəbəkələrdə necə paylaşımlar edə bilməsinə maraq göstəriblər. Nəticədə koloniya onun vəkilləri ilə ünsiyyətinə nəzarəti gücləndirib və bəzi məktublar sadəcə ünvanına çatmayıb.

Hazırda Navalnının vəkilləri Vadim Kobzev, Aleksey Lipçer və İqor Serqunin "ekstremist” təşkilatın fəaliyyətində iştirak ittihamı ilə məhkəmədədirlər. Məhkəmə prosesi Vladimir vilayətinin Petuşki şəhər məhkəməsində qapalı rejimdə keçirilir.

N.Təbrizli