Timsah yeniyetməni parçaladı - FACİƏ

Avstraliyada timsah yeniyetmə qrupuna hücum edib, onlardan birini yaxalayaraq suya dartıb. 

ANN.Az-ın "Vesti.ru"ya istinadən verdiyi xəbərə görə, Avstraliyanın şimalında faciəvi hadisə baş verib, timsah 12 yaşlı oğlana hücum edib. İnsident Darvindən 200 kilometr şərqdə yerləşən Kakadu milli qoruğunda baş verib. Bir neçə yeniyetmə yağışlardan sonra əmələ gələn göldə çimirlərmiş. Qəfildən onlara timsah hücum edib, timsah bir yeniyetmənin qolunu dişləyib. Yeniyetmə cəld tərpənərək, göldən çıxmağa müvəffəq olub. Bu zaman yırtıcı heyvan digər yeniyetməyə hücum edib və oğlanı suyun altına çəkib. 

Bölgənin mühafizəçiləri iki nəhəng timsahı öldürərək, onların qarnını yırtıblar, ancaq orada insan qalıqları tapılmayıb. İtgin düşən yeniyetmənin axtarışları davam edir, ancaq polis onun sağ qaldığına ümid etmir. 

Bu, 2014-cü ildə Avstraliyada timsah hücumu zamanı baş verən ilk ölümdür. 2004- cü ildə sonrakı statistikaya əsasən, hər il bu ölkədə insanlara qarşı 4-5 timsah hücumu hadisəsi baş verir, təəssüf ki, hər dörd hücumdan birində bir nəfər timsahın qurbanına çevrilir. 

ANN.Az