Tampa qarşı qaldırılan cinayət işi bağlanmayacaq

İş üzrə hakim qərar verib ki, Trampın 18+ filmlərinin ulduzu Stormi Danielsə ödənişləri gizlətmə işi üzrə ittiham hökmü prezident toxunulmazlığı ilə bağlı Ali Məhkəmənin qərarı əsasında ləğv edilə bilməz.

Merçanın qərarı, Trampın vəkillərinin may ayında onun 34 bənd üzrə biznes hesabatlarının saxtalaşdırılmasına görə təqsirli bilinməsini ləğv etdirmək cəhdlərindən birini rədd edib.

Bununla belə, hakim Trampın yenidən prezident seçilməsi səbəbindən ittiham hökmünün ləğvinə dair vəkillərin verdiyi vəsatətə dair qərar çıxarmayıb. Onun 41 səhifəlik qərarı əksinə, prezident toxunulmazlığı məsələsinə diqqət yetirib.

Merçan yazıb ki, Ali Məhkəmənin Trampın prezident vəzifəsində olduğu dövrdə rəsmi hərəkətləri ilə bağlı geniş toxunulmazlıq alması barədə qərarı ittiham hökmünün ləğvini tələb etmir. O, Manhattan Prokurorluğu tərəfindən təqdim edilən sübutların Trampın prezident postunda rəsmi fəaliyyətinə aid olmadığını vurğulayıb. Hakimin sözlərinə görə, Trampın vəkillərinin mübahisələndirdiyi sübutlar "yalnız qeyri-rəsmi davranışa” aiddir və bu səbəbdən toxunulmazlıqla qorunmamalıdır.

Trampın sözçüsü Stiven Çunq isə Merçanın qərarını "Ali Məhkəmənin toxunulmazlıq qərarına və digər çoxillik hüquq təcrübəsinə birbaşa zidd” adlandırıb.