İsrail BMT-nin İnsan Haqları Şurasından çıxdığını elan edib

ABŞ-ın ardınca  İsrail də BMT İnsan Haqları Şurasından (UNHRC) çıxmaq qərarına gəlib. Bu barədə yəhudi dövlətinin xarici işlər naziri Gideon Saar X sosial şəbəkəsindəki səhifəsində bildirib.

Onun sözlərinə görə, İsrail ABŞ prezidenti Donald Trampın ölkəni BMT-nin İnsan Haqları Şurasından çıxarmaq qərarını alqışlayır.

"İsrail Birləşmiş Ştatlara qoşulur və UNHRC-də iştirak etməyəcək”, - Saar yazıb.

Nazir UNHRC-ni "ənənəvi olaraq insan haqlarını pozanları qorumaqda, onlara tənqiddən gizlənməyə imkan verməkdə” və "Yaxın Şərqdə yeganə demokratiyanı – İsraili daim iblisləşdirməkdə” ittiham edib.

Xarici İşlər Nazirliyinin rəhbəri xatırladıb ki, BMT-nin İnsan Hüquqları Şurası yəhudi dövlətini pisləyən 100-dən çox qətnamə qəbul edib. Bu, Şuranın bütün mövcudluğu dövründə qəbul edilmiş qətnamələrin 20%-dən çoxunu təşkil edir və " İran , Kuba , Şimali Koreya və Venesuelaya qarşı qəbul edilən qətnamələrdən də çoxdur”.

Saar vurğulayıb ki, İsrail bundan sonra UNHRC-yə qarşı ayrı-seçkiliyə dözməyəcək.

İsrail parlamentinin (Knesset) 28 oktyabr 2024-cü il tarixində səs çoxluğu ilə qəbul etdiyi qurumun fəaliyyətinin qadağan edilməsi qərarına əsasən, İsrail BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyi (UNRWA) ilə bütün əlaqələri yanvarın 30-da dayandırıb . Müvafiq qanunun qəbul edilməsinə səbəb təşkilatın Fələstinin radikal HƏMAS hərəkatı ilə əməkdaşlıq etməsi ilə bağlı ittiham olub.


Aytac