Bolqarıstanda Avropa valyutasına qarşı etiraz aksiyası keçirilib

Bolqarıstan paytaxtında vahid Avropa valyutasının dövriyyəyə buraxılmasına etiraz olaraq kütləvi aksiya keçirilib.Bu barədə Teleqraf xəbər verib.

Paytaxtda nəqliyyatın hərəkəti bir neçə saatlıq dayanıb.Aksiyanı Dirçəliş Partiyası təşkil edib.

Partiya lideri Kostadin Kostadinov deyib:

"Biz Bolqarıstan levini qorunmasını istəyirik və avronun Bolqarıstanda tətbiqinə qarşı mübarizə aparırıq. Bolqarıstanın məcburi şəkildə avrozonaya daxil edilməsinə etiraz edirik, 604 min insan avronun buraxılması ilə bağlı referendumun keçirilməsini dəstəkləyib, lakin parlament bu təşəbbüsü qulaqardına vurub".

O bildirib ki, növbəti etiraz aksiyası çərşənbə günü, fevralın 26-da parlament binası qarşısında keçiriləcək.

Mindən çox insanın iştirak etdiyi aksiya Bolqarıstan Milli Bankının (BNB) binası qarşısında başlayıb, ardınca Avropa Parlamenti və Avropa Komissiyasının binasına doğru yürüş keçirilib. Etirazçılar binaya yumurta və boya atıblar, pirotexniki vasitələrdən istifadə olunub. Binanın giriş qapısını yandırmağa cəhd olunub, lakin yanğın tez söndürülüb.

Sofiya polisinin direktor müavini Stefan İvanov bildirib ki, etirazçılarla polis arasında toqquşma nəticəsində 10-a yaxın hüquq-mühafizə orqanı əməkdaşı yaralanıb, 6 nəfər saxlanılıb.