ABŞ və Ukrayna rəsmiləri gizli görüş keçirib

ABŞ prezidenti Donald Trampın nümayəndələri Ukrayna prezidenti Vladimir Zelenski ilə gizli danışıqlar aparıblar. Bu barədə CNN mənbələrə istinadən məlumat yayıb.

Qeyd olunur ki, görüş zamanı yüksək rütbəli amerikalı məmurlar Vaşinqtonla münasibətlərin tezliklə sabitləşməsinin vacibliyini vurğulayaraq  Kiyevi danışıqları bərpa etməyə çağırıblar.

Kanalın mənbələri dəqiqləşdirib ki, gizli danışıqlarda iştirak edən məmurlardan biri Trampın Ukrayna və Rusiya üzrə xüsusi nümayəndəsi Keyt Kelloqdur.

Martın 4-də ABŞ Ukraynaya hərbi yardımı dayandırıb. Qərar fevralın 28-də Ağ Evin Oval kabinetində Tramp və Ukrayna prezidenti Vladimir Zelenski arasında keçirilən gərgin görüşdən sonra verilib. Bu görüşdə Amerika lideri Zelenskinin Amerikanın köməyinə görə təşəkkür etməməsindən narazılığını bildirib. Tramp bildirib ki, fasilə “Ukrayna liderləri sülhə həqiqi sadiqlik nümayiş etdirənə qədər” davam edəcək.

Bundan əvvəl Rusiya prezidenti Vladimir Putin qeyd etmişdi ki, Zelenski Rusiya ilə danışıqlardan yayınır, çünki onların başlaması qaçılmaz olaraq ölkədə hərbi vəziyyətin ləğvi zərurətinə gətirib çıxaracaq. Bunun ardınca Ukraynada prezident seçkilərinin keçirilməsi zərurəti yaranacaq. Eyni zamanda, Putin Zelenskinin seçkilərdə qalib gəlmək şansının sıfır olduğunu vurğulayıb.

Aytac