Trampın siyasəti Maska da əngəl törədir

Tesla, ABŞ prezidenti Donald Trampın təşəbbüsü ilə Çin mallarına tətbiq olunan yüksək tariflər səbəbindən Cybercab elektrik taksisi və Semi yük avtomobili üçün Çindən komponent tədarükünü dayandırmaq məcburiyyətində qalıb. Bu barədə Reuters agentliyi, məsələ ilə tanış mənbələrə istinadla xəbər yayıb.

“Bu addım Tesla-nın kütləvi istehsala başlamaq planlarını pozaraq, İlon Maskın investorlar qarşısında əsas innovativ layihə kimi təqdim etdiyi modellərin buraxılışını təxirə sala bilər,” – agentlik yazır.

Şirkət əvvəlcə 34 faiz tariflə yaranan xərcləri qarşılamağa hazır idi. Lakin tariflərin əvvəlcə 84 faizə, sonra isə 125 faizə qədər artırılması nəticəsində ümumi vergi yükü 145 faizə çatıb və bu da komponentlərin idxalını iqtisadi baxımdan mümkünsüz dib. Nəticədə, istehsal prosesi dayandırılıb.

Tədarüklərin yaxın aylarda başlaması planlaşdırılırdı. Sınaq istehsalı oktyabrda, kütləvi buraxılış isə 2026-cı ildə nəzərdə tutulurdu. Cybercab Texasda, Semi isə Nevadada istehsal olunmalı idi.

Hadisə Trampın siyasətinin, hətta onu dəstəkləyən İlon Mask kimi şəxslərə belə, necə mənfi təsir göstərə biləcəyini ortaya qoydu.

Washington Post daha əvvəl yazmışdı ki, Mask Trampa şəxsən müraciət edərək yeni tariflərin ləğvini xahiş edib və bu tədbirlərin qlobal təchizat zəncirinə risk yaratdığını bildirib.

Bundan əlavə, Tesla Çinin ABŞ məhsullarına 125 faiz cavab rüsumu tətbiq etməsindən sonra Model S və Model X avtomobilləri üçün sifariş qəbulunu dayandırıb.

N.Təbrizli