ABŞ Rusiya və Ukrayna danışıqlarından nəticə və vaxt cədvəli tələb edir

Birləşmiş Ştatlar Rusiya və Ukrayna arasında aparılan danışıqlardan konkret nəticələr gözləyir və onların aylarla uzanmasını istəmir, Dövlət Departamentinin sözçüsü Təmmi Brüs brifinqdə bildirib.

“Bunun aylarla davam etməsinə və ya görüşlərin sadəcə görüş naminə keçirilməsinə imkan verilməyəcək. Bu, bir il çəkməyəcək”, — Brüs bildirib.

O əlavə edib ki, Prezident Donald Tramp və Dövlət katibi Marko Rubio “nəticələr və dəqiq vaxt cədvəli” gözləyirlər.

Onun sözlərinə görə, danışıqlarda irəliləyiş əldə olunarsa, “bu prosesə təkan verə və vəziyyəti dəyişə bilər”.

Brüs Tramp və Rubionun mövqeyinə əsaslanaraq bildirib ki, münaqişənin həlli tərəflərin özlərinin iştirakı ilə olmalıdır.

Eyni zamanda, Türkiyənin xarici işlər naziri Hakan Fidan bildirib ki, Prezident Rəcəb Tayyib Ərdoğan Rusiya, Ukrayna və ABŞ prezidentlərinin görüşünə ev sahibliyi etməyə hazırdır.

“Bu ideyanı cənab Prezidentlə müzakirə edəndə, o, dərhal sülh naminə hazır olduğunu bildirdi. Hazırda ona olan etimad səviyyəsinə malik başqa bir lider yoxdur”, — Fidan TRT Haber-ə müsahibəsində deyib.

Onun sözlərinə görə, prezidentlərin görüşünün baş tutması üçün nümayəndə heyətlərinin “müəyyən mərhələyə çatması” və “konkret həllərin hazırlanması” vacibdir.

Fidan əlavə edib ki, danışıqların bir neçə raundundan sonra dövlət başçılarının görüşü “qaçılmaz olacaq”.

N.Təbrizli