Ermənistan KTMT-yə üzvlük haqqını ödəməyib

Ermənistan 2024-cü il üçün Kollektiv Təhlükəsizlik Müqaviləsi Təşkilatına (KTMT) üzvlük haqqını ödəməyib. Bu barədə ölkənin xarici işlər naziri Ararat Mirzoyan məlumat verib.

“KTMT-də iştirakımızın dondurulması ilə bağlı Ermənistan bu təşkilata 2024-cü il üçün üzvlük haqqını ödəməyib”, — Mirzoyan cümə axşamı parlamentdə çıxışı zamanı bildirib.

Bundan əvvəl Rusiyanın xarici işlər nazirinin müavini Aleksandr Pankin bildirib ki, əgər Ermənistan 2025-ci ilin sonunadək KTMT-yə üzvlük haqqını ödəməsə, təşkilatın üzv ölkələri “müxtəlif ssenariləri” nəzərdən keçirəcəklər.

Mirzoyan qeyd edib ki, Ermənistan və Rusiya arasında siyasi dialoq  davam edir.

“İlin əvvəlindən etibarən Rusiya ilə fəal dialoqdayıq. Xatırlayırsınızsa, ilin əvvəlində Rusiyaya səfər etmişdim, bu yaxınlarda isə xarici işlər naziri Sergey Lavrov ölkəmizə səfər edib”, —  o əlavə edib.

N.Təbrizli