Natanzdakı nüvə obyektinə zərər vurulub - Yenilənib

İranın Natanz şəhərindəki nüvə obyektlərində radioloji və kimyəvi çirklənmə aşkar edilib.Bu barədə Beynəlxalq Atom Enerjisi Agentliyinin rəhbəri Rafael Qrossi bildirib.

O, qeyd edib ki, zərbələrdən sonra obyektin içərisinə alfa hissəcikləri şəklində radiasiya yayılıb.Obyektdən kənarda radiasiya səviyyəsi normal həddə qalıb və içəridəki çirklənmə mühafizə tədbirləri ilə idarə oluna bilər.

Qrossi vəziyyəti qiymətləndirmək və təhlükəsizliyi təmin etmək üçün mümkün qədər tez İrana səfər etməyə hazır olduğunu bildirib.

16:12

Cümə günü yayımlanan peyk görüntüləri İsrailin hava zərbələrindən sonra İranın İsfahan əyalətində yerləşən Natanz uranın zənginləşdirilməsi obyektində zədələnmələrin olduğunu göstərir. Bu barədə Qərb kəşfiyyat mənbələri və İran mediası məlumat yayıb.

Zərbə iyunun 13-də səhər tezdən həyata keçirilib və İsrailin əsas nüvə təhlükəsi hesab etdiyi Natanz obyektini hədəf alıb.

İsrailin “12-ci kanal”ı kəşfiyyat mənbələrinə istinadla bildirib ki, obyekt “ciddi şəkildə zədələnib” və ya “tamamilə məhv edilib.” İran bu iddiaları təsdiqləməyib.

Beynəlxalq Atom Enerjisi Agentliyi (MAQATE) bildirib ki, İran zərbəni təsdiqləyib, lakin radioaktiv və ya kimyəvi sızma qeydə alınmayıb. “İlkin qiymətləndirmələr göstərir ki, obyektin bəzi hissələri zədələnib. Heç bir radioaktiv və ya kimyəvi çirklənmə və ya sızma aşkar edilməyib”, – İranın Atom Enerjisi Təşkilatı dövlət televiziyasında yayımlanan bəyanatda bildirib.

Təşkilat əlavə edib ki, zərbə zamanı obyektin əməkdaşları arasında itki qeydə alınmayıb.

MAQATE bildirib ki, Fordo, İsfahan və Busherdəki digər nüvə obyektləri zərbələrdən zərər görməyib. Agentliyin məlumatına görə, Natanzdakı radiasiya səviyyələri təhlükəsiz həddədir və vəziyyətin diqqətlə izlənməsi davam etdirilir.