“Buşehr” AES vurularsa ikinci Çernobil ola bilər– Rosatom

Rusiya dövlət nüvə korporasiyası “Rosatom” İranın “Buşehr” Atom Elektrik Stansiyasından ezamiyyətdə olan əməkdaşlarının bir hissəsini evakuasiya edib. Bu barədə Rosatom-un baş direktoru Aleksey Lixachev jurnalistlərə açıqlama verib.

“Buşehr AES-də ezamiyyətdə olan bir qrup əməkdaş artıq çıxarılıb. Evakuasiya prosesində yardım göstərdikləri üçün Azərbaycana və Ermənistana təşəkkür edirik. Müxtəlif yollarla, amma müsbət nəticə əldə etdik”, –  Lixachev bildirib.

Rosatom, zərurət yaranacağı halda ilk növbədə qadınlar və uşaqlar da daxil olmaqla AES-dən əlavə evakuasiya aparılacağını istisna etmir.

Lixachev əlavə edib ki, İsrailin İranda atom obyektlərinə endirdiyi zərbələr nəticəsində radiasiya sızması qeydə alınmayıb.

Lakin o xəbərdarlıq edib ki, “Buşehr”dəki işlək enerji blokuna hücum halında nəticələr Çernobıl qəzası ilə müqayisə oluna bilər.

“Əgər birinci enerji blokuna zərbə endirilərsə, bu, Çernobıla bərabər bir fəlakət ola bilər”, – d o bildirib.

Rusiyanın Tehrandakı səfirliyi isə bəyan edib ki, “Buşehr” stansiyası normal rejimdə fəaliyyət göstərir və rusiyalı mütəxəssislər üçün təhlükə yoxdur.

Kremlin sözçüsü Dmitri Peskov isə bildirib ki, İsrail Rusiya tərəfinə “Buşehr” AES-də çalışan mütəxəssislərin təhlükəsizliyinə zəmanət verdiyini təsdiqləyib.

N.Təbrizli