London məhkəməsi İsrailə F-35 hissələrinin ixracına etirazı rədd edib

Böyük Britaniyanın Ali Məhkəməsi insan hüquqları fəallarının İsrailə F-35 təyyarələri üçün komponentlərin ixracını dayandırmaq iddiasını rədd edib və bildirib ki, bu qərarı yalnız hökumət verə bilər.

Məhkəmə qərarında ixrac məhdudiyyətlərinin icrası səlahiyyətinin hökumətə aid olduğu vurğulanıb.

Sky News-un məlumatına görə, Britaniya silahları İsrailin hərbi texnikasının cəmi 0,02%-ni təşkil edir. İsrail Britaniyanın silah ixracının 0,4%-ni alır.

“Silah Ticarətinə Qarşı Kampaniya” təşkilatı bildirib ki, İsrailin Qəzzada istifadə etdiyi F-35 təyyarələrinin komponentlərinin təxminən 15%-i Britaniyada istehsal olunur.

2024-cü ildə Britaniya İsrailə 30 silah ixrac lisenziyasını dayandırıb. Bunlar pilotsuz uçuş aparatları və helikopterlər üçün hissələri əhatə edirdi. F-35 hissələri ABŞ vasitəsilə göndərildiyi üçün məhdudiyyətə daxil edilməyib.

N.Təbrizli