Rusiyanın sabiq müdafiə nazir müavini 13 il azadlıqdan məhrum edildi

Moskva Şəhər Məhkəməsi Rusiya Müdafiə Nazirliyinin sabiq müavini Timur İvanovu mənimsəmə və cinayət yolu ilə əldə olunmuş gəlirləri leqallaşdırma ittihamı ilə 13 il müddətinə azadlıqdan məhrum edib. Bu barədə “İnterfaks” agentliyi məlumat yayıb.

Məhkəmə həmçinin İvanova 100 milyon rubl cərimə təyin edib və onun dövlət mükafatlarını əlindən alıb. Onun və ailə üzvlərinin daha əvvəl həbs qoyulmuş bütün əmlakı dövlətin xeyrinə müsadirə olunub.

İvanovun keçmiş tabeliyində olan Anton Filatov isə mənimsəmə işi üzrə 12,5 il müddətinə azadlıqdan məhrum edilib və 25 milyon rubl cərimələnib.

Məhkəmə İvanov və Filatovdan zərərçəkmiş tərəflərin iddiaları üzrə 3,5 milyard rublun ödənilməsinə qərar verib.

Onlar Kerç boğazı üçün iki bərənin alınması və “Interkommerts” bankından 3,9 milyard rublun çıxarılması ilə bağlı vəsaitlərin mənimsənilməsində ittiham olunurdular.