İranda varislik mübarizəsi qızışır, Xomeyninin nəvəsi yarışa qoşulur

Ali dini lider Ayətullah Əli Xameneyinin səhhətinin pisləşməsi fonunda İranda siyasi varislik uğrunda mübarizə intensivləşir. İranın təsisçisi Ruhullah Xomeyninin nəvəsi Həsən Xomeyni əsas rəqiblərdən biri kimi ön plana çıxır.

Xameneyi son aylarda ictimaiyyət qarşısına çıxmayıb. Mənbələrə görə, o, IRGC-nin xüsusi bölməsi “Vali-ye Amr” tərəfindən nəzarət altında saxlanılır və qərarvermə proseslərindən təcrid olunub.

İran elitası arasında Xameneyinin mümkün varisləri sırasında oğlu Möctəba Xameneyi və 53 yaşlı Həsən Xomeyni önə çıxır.

Möctəba IRGC ilə sıx əlaqələri səbəbilə konservativ dairələrin dəstəyini alır, lakin islahatçılar və ictimaiyyət Həsən Xomeyninin namizədliyinə üstünlük verir.

Həsən Xomeyni islahatçı ritorikası ilə çıxış edir. O, hicabın məcburi olmamasını, hərbi strukturların siyasətdən uzaq tutulmasını və demokratiyanın gücləndirilməsini təklif edir.

Bu çıxışlar İran cəmiyyətində geniş dəstək qazanır.

İslam Respublikasının qurucusunun nəvəsi kimi Həsən Xomeyninin iddiaları İranın gələcəyi üçün həlledici ola bilər.

Siyasi müşahidəçilər onun qarşıdan gələn dövrdə əsas fiqura çevriləcəyini proqnozlaşdırır.

N.Təbrizli