Polşa Almaniya ilə sərhəddə müvəqqəti sərhəd nəzarətinə başlayıb

Polşa iyulun 7-dən etibarən Almaniya ilə sərhədində stasionar sərhəd nəzarətini bərpa edib. Yoxlamalar gecə yarısından etibarən 52 keçid məntəqəsində tətbiq olunub və azı avqustun 5-dək davam edəcək. 

Rəsmilərin bildirdiyinə görə, sərhəddən keçən şəxslərin pasport və şəxsiyyət vəsiqələri yoxlanılacaq.

Polşa sərhəd xidmətləri, xüsusilə sərnişin avtobusları, mikroavtobuslar və şüşələri qaralmış nəqliyyat vasitələrinə diqqət yetirəcəklər.

Oxşar tədbirlərin Litva ilə sərhəddə də həyata keçirilməsi planlaşdırılır.

Baş nazir Donald Tusk bildirib ki, sərhəd nəzarətinin gücləndirilməsi "qanunsuz miqrantların nəzarətsiz axınını məhdudlaşdırmaq" məqsədi daşıyır.

Tusk həmçinin qeyd edib ki, bu qərar qismən Almaniyanın sərt miqrasiya siyasətinə cavab olaraq qəbul edilib.

Mayda Almaniyanın yeni daxili işlər naziri Aleksandr Dobrindt Polşa ilə sərhəddə nəzarətin gücləndirilməsini və sığınacaq axtaranların geri qaytarılmasını əmr etmişdi.

Aytac