ABŞ-da Patriot raketlərinin ehtiyatı tükənmək üzrədir — The Guardian

ABŞ Müdafiə Nazirliyinin əməliyyat ehtiyaclarını qarşılamaq üçün tələb olunan Patriot zenit-raket sistemlərinə aid raketlərin təxminən 25%-i qalıb. Bu barədə The Guardian qəzeti müdafiə sahəsindəki mənbələrə istinadən xəbər verir.

Məlumata görə, raketlərin bir hissəsi Yaxın Şərqdəki əməliyyatlarda istifadə olunub. Raket qıtlığı ABŞ-ın Ukraynaya hərbi yardımını müvəqqəti dayandırmasının əsas səbəblərindən biri kimi göstərilir.

Mənbələr bildirir ki, ABŞ ordusunun bəzi vacib sursat növləri üzrə ehtiyatları artıq bir neçə ildir minimum səviyyədən aşağıdır və bu vəziyyət Bayden administrasiyası dövründə Ukraynaya silah tədarükü ilə daha da pisləşib.

Donald Trampın hazırkı administrasiyası isə fevraldan etibarən strateji sursat ehtiyatlarının həcmini yenidən nəzərdən keçirməyə başlayıb — xüsusilə Yaxın Şərqdə əlavə Patriot batareyalarının yerləşdirilməsindən sonra.

Almaniyanın Bild nəşri Ukraynanın da yaxın 1–2 həftədə Patriot raketlərini tükədə biləcəyini yazmışdı.

N.Təbrizli