Rusiya Kiyevə raket və dronlarla hücum edib, şəhərin bir neçə rayonunda yanğınlar başlayıb

Rusiya ordusu bu gün səhər saatlarında Ukraynanın paytaxtı Kiyevə raket və dron hücumu təşkil edib, nəticədə şəhərin beş rayonunda yanğınlar baş verib.

Şəhər üzrə güclü partlayış səsləri eşidilib. Ukrayna rəsmiləri hələlik dinc sakinlər arasında tələfat olmadığını bildirir.

Kiyev meri Vitali Kliçko bildirib ki, hücum zamanı və onun nəticələrinin aradan qaldırılması prosesində təcili yardım xidmətləri Şevçenko və Solomyan rayonlarına çağırılıb. İlkin məlumata görə, Şevçenko rayonunda pilotsuz uçuş aparatı (PUA) qalıqları yaşayış binasına düşüb, Darnitsa rayonunda isə digər bir yaşayış binası, yanacaqdoldurma məntəqəsi və qarajlar yanır.

Kiyev şəhər hərbi administrasiyasının rəhbəri Timur Tkaçenko bildirib ki, Solomyan rayonunda dron qalıqları qeyri-yaşayış binasına düşüb, başqa bir qeyri-yaşayış binanın damı yanır.

N.Təbrizli