Polşa Belarusun dialoqu bərpa etmək təklifini rədd edib

Polşa Belarusun ikitərəfli dialoqu bərpa etmək təklifini rədd edib. Səbəb kimi miqrant böhranı və Minsk rəhbərliyinin Rusiyanın, o cümlədən Ukraynadakı müharibə ilə bağlı siyasətini dəstəkləməsi göstərilib. Bu barədə Polşanın Xarici İşlər Nazirliyi çərşənbə axşamı bildirib.

Bundan əvvəl Belarus Müdafiə Nazirliyi Polşa XİN-ə əlaqələrin bərpası təşəbbüsü ilə məktub göndərmişdi.

“Mövcud vəziyyətdə Polşa Belarusla dialoqun bərpasını qətiyyətlə rədd edir”, – bəyanatda deyilir.

Varşava Minsk-i ortaq sərhəd boyunca qanunsuz miqrant axınını təşkil etməkdə, həmçinin Rusiya ilə hərbi və siyasi əməkdaşlıqda ittiham edir.

“Dövlətlər arasında hərbi əməkdaşlıq qarşılıqlı etimadı gücləndirmək məqsədilə beynəlxalq münasibətlər çərçivəsində müəyyən minimum qaydalara riayət olunmasını tələb edir”, – nazirlik qeyd edib və mövcud şəraitdə danışıqlar üçün imkan görmədiyini vurğulayıb.

N.Təbrizli