Tramp–Putin görüşündən sonra Rusiya təyyarələri Alyaska üzərində fəallaşıb

 ABŞ və Rusiya prezidentləri Donald Tramp və Vladimir Putinin avqustda Ankoricdəki hərbi bazada keçirdiyi görüşdən sonra Rusiya kəşfiyyat təyyarələrinin Alyaska üzərində uçuşları kəskin artıb. Bu barədə Stars and Stripes Pentaqona istinadən xəbər verir.

Avqustun 26-da NORAD Alyaska yaxınlığında yerləşən Şemya adası ətrafında Rusiyanın İl-20 təyyarəsini beşinci dəfə bir həftə ərzində müşayiət edib.

Təyyarə 2 saat 20 dəqiqə hava hücumundan müdafiə identifikasiya zonasında qalıb və materikə 48 km məsafəyə qədər yaxınlaşıb.

ABŞ F-16 qırıcıları, E-3 Sentry radar nəzarət təyyarəsi və KC-135 tankeri havaya qalxaraq vizual təmas qurub.

NORAD nümayəndəsi, Kanada Silahlı Qüvvələrinin kapitanı Rebeka Qarand bildirib ki, Rusiya təyyarəsi ABŞ və ya Kanada hava məkanını pozmayıb.

Fevral–iyul ərzində cəmi beş belə insident qeydə alınsa da, Tramp–Putin sammitindən sonra yeddi gün ərzində beş dəfə belə uçuşlar baş verib.

N.Təbrizli