Qətər Dohaya hücumla bağlı İsrailə cavab veriləcəyini açıqlayıb

Qətər Baş naziri və Xarici İşlər Naziri Şeyx Məhəmməd bin Əbdülrəhman bin Casim Al Tani bəyan edib ki, İsrailin Dohada HƏMAS rəhbərlərinə qarşı həyata keçirdiyi hava zərbəsinə cavab veriləcək.

O bildirib ki, cavab tədbirləri regional tərəfdaşlarla müzakirə olunacaq və yaxın gələcəkdə Dohada zirvə görüşü keçirilməsi planlaşdırılır; lakin görüşün dəqiq tarixi hələ açıqlanmayıb.

Şeyx Al Tani vurğulayıb ki, Qətər həm HƏMAS-la İsrail arasında atəşkəs əldə olunmasında vasitəçilik rolunu, həm də HƏMAS-ın gələcəkdə Qətərdə fəaliyyətini yenidən dəyərləndirir.

O, İsrail Baş naziri Binyamin Netanyahunu “dövlət terrorçuluğunda” ittiham edərək, Yaxın Şərqi xaosa sürükləməkdə və Qətərin vaxtını boşa sərf etməkdə suçlayıb.

Baş nazir həmçinin bildirib ki, İsrailin həyata keçirdiyi hava zərbəsi nəticəsində bir neçə qətərli rəsmilər yaralanıb və onların vəziyyəti kritikdir.