Mask Böyük Britaniya parlamentinin buraxılmasına çağırıb

Amerikalı iş adamı və milyarder İlon Mask onlayn çıxış etdiyi sağçı fəal Tommi Robinsonun aksiyasında Böyük Britaniya parlamentinin buraxılmasına və növbədənkənar seçkilərin keçirilməsinə çağırıb.

Mask sosial mediada bildirib ki, hazırkı hakimiyyətin fəaliyyət müddəti “çox uzun” olub və bu vəziyyətin dəyişməsi vacibdir. O əlavə edib ki, ölkə nəzarətsiz miqrasiya, bürokratiya və söz azadlığına qoyulan məhdudiyyətlərdən əziyyət çəkir və genişmiqyaslı dövlət islahatları aparılmalıdır.

Şənbə günü Londonda Tommi Robinsonun təşkilatçılığı ilə etiraz aksiyası keçirilib.Aksiya iştirakçılarının sayı 110 minə qədər olub. Aksiya zamanı toqquşmalar yaşanıb və doqquz nəfər saxlanılıb.