Niderland Ukraynaya əlavə olaraq 90 milyon avro ayıracaq

Niderland Ukraynaya kəşfiyyat və zərbə dronlarının istehsalı üçün 90 milyon avro ayıracaq. Bu barədə Niderlandın müdafiə naziri Ruben Brekelmans NATO ölkələrinin müdafiə nazirlərinin Brüsseldə keçirilən görüşü zamanı bildirib.

Nazir vurğulayıb ki, Ukraynaya dəstək indi əvvəlkindən daha vacibdir, çünki hər gün Ukraynanın enerji infrastrukturu üzərinə güclü hava hücumları qeydə alınır. Nazir qeyd edib ki, ukraynalılar yaxınlaşan qışın müharibə dövrünün ən ağır qışı olacağını xəbər veriblər.

“Biz Ukraynaya davamlı yardım axını təmin etməliyik. Niderland isə bundan əvvəlkindən daha çox dəstək verir. Bir neçə gün öncə 200 milyon avroluq dəstəyi elan etdim. Bu gün isə həm kəşfiyyat, həm də zərbə dronları üçün əlavə 90 milyon avroluq yeni paketi bildirirəm”, — Brekelmans bildirib.

O əlavə edib ki, Ukraynanın hələ də pilotsuz uçuş aparatlarının istehsalı üçün böyük sənaye potensialı var və buna görə də Niderland əlavə investisiyalar yatırır.