Tramp Malayziyaya səfər edəcək

ABŞ Prezidenti Donald Tramp oktyabrın 26-da Malayziyaya səfər edəcək.Bu barədə Malayziyanın xarici işlər naziri Mohamad Hasan “Reuters”ə açıqlamasında bildirib.

O, qeyd edib ki, səfərin məqsədi Tailand və Kamboca arasında illərlə davam edən sərhəd münaqişəsinin başa çatmasını rəsmi şəkildə təsdiqləyən sənədin imzalanması mərasimində iştirak etməkdir.

Nazirin sözlərinə görə, sənədin imzalanması 26-28 oktyabrda ASEAN liderlərinin Kuala-Lumpurda keçiriləcək sammiti zamanı baş tutacaq. Həmin sənəd iki qonşu ölkə arasında dayanıqlı sülh və atəşkəs rejimini təmin etməyi nəzərdə tutur.

Tailandla Kamboca arasında 817 kilometrlik quru sərhədində illərdir müəyyənləşdirilməmiş bölgələr qalır. Bu ilin yayında baş verən beşgünlük silahlı toqquşma nəticəsində onlarla hərbçi və mülki şəxs həlak olub, minlərlə insan isə qaçqın düşüb.