Vaşinqtondakı tarixi addım Ermənistan və Azərbaycanı uzunmüddətli sülhə yaxınlaşdırdı - Kalas

 Ermənistan və Azərbaycan arasında sülh prosesi regionu sabitliyə və uzunmüddətli sülhə yaxınlaşdırır. Bunu  Avropa İttifaqının xarici işlər və təhlükəsizlik siyasəti üzrə ali nümayəndəsi Kaia Kalas bildirib.

Kalasin Yerevanda keçirilən Avronest Parlament Assambleyasının 12-ci plenar sessiyasına ünvanladığı mesaj onun adından Aİ Xarici Fəaliyyət Xidmətinin direktor müavini Odrone Perkauskininkai tərəfindən təqdim olunub.

“Avqustun 8-də Vaşinqtonda atılan tarixi addım regionu sabitliyə və davamlı sülhə yaxınlaşdırıb. Biz Ermənistan və Azərbaycan arasında münasibətlərin normallaşdırılması prosesini dəstəkləyirik və regionun firavanlıq və inkişafa doğru irəliləməsinə açıq dəstək veririk”, – Kalasın mesajında deyilir.

Aİ rəsmisi qeyd edib ki, nizamlanma prosesi yeni iqtisadi imkanlar, açıq sərhədlər və güclənən transsərhəd əlaqələr vəd edir.

“Hazırkı proses insanlar arasında etimadın və qarşılıqlı əlaqələrin dərinləşməsinə xidmət edəcək”, – o əlavə edib.

Kalas, həmçinin, Ermənistanla Avropa İttifaqı arasındakı münasibətlərin dərinləşdiyini vurğulayıb. 

“İkitərəfli münasibətlərdəki son hadisələr göstərir ki, Ermənistan öz dəyərləri və demokratik prinsipləri ilə bizə yaxınlaşır", - bildirib.

Aytac