Qətər ABŞ və Venesuela arasında vasitəçilik etməyə hazırdır

Vaşinqton maraqlı olarsa, Doha ABŞ və Venesuela arasındakı böhranın həllində vasitəçi kimi çıxış edə bilər.Bu barədə Nyu‑Yorkdə keçirilən Xarici Əlaqələr Şurasındakı çıxışında Doha Dövlətinin Baş naziri və xarici işlər naziri Şeyx Məhəmməd bin Əbdülrəhman bin Casim Al Tani bildirib.

Onun sözlərinə görə, Doha hələlik bu istiqamətdə “heç bir konkret addım” atmayıb.

“Venesuela ilə bağlı səylərimizə gəlincə, biz onlarla ABŞ-nin keçmiş başçısı Co Baydenin prezidentlik dövründə qarşılıqlı fəaliyyətə başladıq. Bu qarşılıqlı əlaqə evlərinə qayıdan bir neçə Amerika vətəndaşının azad edilməsinə səbəb oldu. İndi ABŞ prezidenti Donald Trampın gəlişi ilə biz onlarla əlaqəni bərpa etdik. Əgər ABŞ hələ də maraqlıdırsa, biz vasitəçi kimi çıxış etməyə və danışıqlar prosesinin təşkilinə kömək etməyə hazırıq. Lakin bu zaman konkret və ya əhəmiyyətli heç nə baş vermir”, – deyə Al Tani əlavə edib.