Ermənistanda 10-a yaxın din xadimi istintaqa çağırılıb

Ermənistanın İstintaq Komitəsində bu gün iki din xadimi – keşişlər Yeqişe Barseqyan və Muşe Vaqanyan dindirilib. Bu barədə  Ermənistan KİV Vaqanyanın vəkili Armine Fanyana istinadən məlumat verib.

“Bu gün keşişləri diskriminasiya və yığıncaqlarda iştirak etməyə məcbur etmə ilə bağlı cinayət işi çərçivəsində dindirməyə çağırıblar”, – vəkil bildirib.

Onun sözlərinə görə, hər iki keşiş şahid qismində ifadə verib.

Fanyan əlavə edib ki, İstintaq Komitəsi tərəfindən daha 10-a yaxın din xadiminə, o cümlədən Araqasotn yeparxiyasının keşişləri Vrtanes Baqalyan, Zorayr Karapetyan və digərlərinə də bildiriş göndərilib.

Oktyabrda mətbuatda 2023-cü ilə aid səs yazısı yayılmışdı. Həmin yazıda katolikos II Qareginin keçmiş əsa daşıyıcısı Aqan Ernjakyan, Eçmiədzinin Xarici əlaqələr və protokol departamentinin direktoru arxiyepiskop Natan Ovannisyanla söhbətində, katolikosun onu hökumət əleyhinə nümayişlərdə iştirak etməyə məcbur etdiyindən şikayət edirdi.

Oktyabrın 17-də isə bu qalmaqallı səs yazısı ilə bağlı cinayət işi açıldığı bildirilib.