Zelenski ilə Putin telefon danışığı apara bilər - Fox News

ABŞ və Ukrayna prezidentləri Donald Tramp və Volodimir Zelenski arasında aparılan danışıqlar Ukrayna liderinin Rusiya prezidenti Vladimir Putinlə beş ildən çox müddətdə ilk telefon danışığına səbəb ola bilər. Bu barədə Fox News telekanalı danışıqlarla tanış olan mənbəyə istinadən bildirib.

Mənbənin sözlərinə görə, Zelenski ilə Putin arasında birbaşa telefon əlaqəsinin təşkili Tramp üçün diplomatik baxımdan ciddi uğur kimi qiymətləndirilə bilər. Bildirilir ki, Ukrayna prezidenti Ağ Ev rəhbəri ilə Floridadakı Mar-a-Laqo iqamətgahında görüş ərəfəsində kifayət qədər gərgin olub.

Mənbə qeyd edib ki, Zelenski adətən bu cür yüksək səviyyəli danışıqlara ciddi hazırlaşır, Ukraynanın xarici siyasət qurumları tərəfindən hazırlanmış materialları ətraflı öyrənməyə vaxt ayırır.

Putin və Zelenski sonuncu dəfə 26 iyul 2020-ci ildə telefonla danışıblar. Kremlin məlumatına görə, həmin söhbət Kiyevin təşəbbüsü ilə baş tutub və tərəflər Ukrayna daxili böhranının həlli ilə bağlı müxtəlif məsələləri müzakirə ediblər.

Donald Tramp və Volodimir Zelenski Floridada, ABŞ prezidentlərinin iqamətgahı olan Mar-a-Laqoda görüş keçiriblər. Danışıqlardan sonra tərəflər Ukraynada hərbi əməliyyatlara son qoyulması üzrə mümkün razılaşma ilə bağlı mövqelərin əhəmiyyətli dərəcədə yaxınlaşdığını açıqlayıblar.

Bununla yanaşı, tərəflər nizamlamanın əsas parametrlərinin – ilk növbədə ərazi məsələsi və Donbasın gələcəyi ilə bağlı mövzuların hələ də açıq qaldığını etiraf ediblər. Tramp bildirib ki, bir neçə həftə ərzində danışıqların konkret razılaşmalarla nəticələnib-nəticələnməyəcəyi aydın olacaq.

Gülnar