İran: ABŞ-la danışıqlar üçün hazırda uyğun şərait yoxdur

Hazırkı mərhələdə ABŞ-la danışıqlar aparmaq üçün münbit şərait mövcud deyil. Bunu İranın xarici işlər naziri Abbas Əraqçi bildirib.

Onun sözlərinə görə, buna Vaşinqtonun yürütdüyü siyasət səbəb olur.

Əraqçi yerli jurnalistlərə açıqlamasında qeyd edib ki, İran heç vaxt danışıqlar masasını tərk etməyib və həmişə qarşılıqlı maraqlar və hörmət prinsipləri əsasında müzakirələrə hazır olub.

“Hazırda ABŞ-la müzakirələr üçün uyğun şərait yoxdur. Bunun əsas səbəbi Amerikanın izlədiyi siyasətdir. İran daim dialoqa açıq olub, lakin ABŞ hökumətində bu cür yanaşma müşahidə edilmir”, –  nazir bildirib.

Tehran və Vaşinqton arasında münasibətlər son illər əsasən nüvə proqramı, sanksiyalar və regional təhlükəsizlik məsələləri fonunda gərgin olaraq qalır. ABŞ-ın İrana qarşı tətbiq etdiyi iqtisadi sanksiyalar tərəflər arasında etimadın bərpasını çətinləşdirən əsas amillərdən biri kimi qiymətləndirilir.

Gülnar