İran riyalı dəyərini itirib, ekranlarda “0,00” görünür

İran milli valyutası riyalın kəskin dəyərsizləşməsi nəticəsində bəzi bank və valyuta mübadilə sistemlərində məzənnə “0,00” kimi əks olunub. Bu barədə dünya valyuta birjialarında qeyd olunub.

Məlumata görə,  bu riyalın rəsmi olaraq sıfırlanması deyil, onun faktiki olaraq iqtisadi funksiyasını itirməsidir.

Mütəxəssislər bildirir ki, bank proqramları adətən məzənnələri vergüldən sonra iki rəqəm formatında göstərdiyi üçün bu qədər kiçik dəyər texniki olaraq ekrana sığmır və “0,00”a yuvarlaqlaşdırılır.

İqtisadçılara görə, bu hal riyalın hüquqi baxımdan dövriyyədən çıxması anlamına gəlmir. Lakin mövcud göstəricilər pul vahidinin real alıcılıq qabiliyyətini itirdiyini və kəskin dəyərsizləşmə mərhələsinə daxil olduğunu göstərir.

Analitiklər qeyd edir ki, Qərb sanksiyalarının davam etməsi, yüksək inflyasiya və regionda təhlükəsizlik riskləri fonunda hökumətin gördüyü sosial dəstək tədbirləri, valyuta böhranının qarşısını almaqda yetərli olmur.

İran riyalının kəskin dəyərsizləşməsinin əsas səbəbi ölkədə davam edən iğtişaşlar və etiraz aksiyalarıdır

İranda etiraz aksiyaları dekabrın 28-dən davam edir. İlk olaraq aksiyaçılar ölkədəki iqtisadi vəziyyətə və milli valyutanın dəyərinin enməsinə etiraz etsələr də, hadisələr daha sonradan siyasi xarakter alıb.

Aytac Zeynalova