İrandakı etirazlar tamamilə yatırılıb - KİV

İran hakimiyyəti ölkə üzrə kütləvi etirazları genişmiqyaslı güc tətbiqi ilə demək olar ki, yatırıb və vəziyyətin artıq stabilləşdiyi bildirilir.Bu barədə “Reuters” agentliyi məlumat yayıb.

Bildirilib ki, etirazlar səngisə də, hökumət yanvarın 16-da yeni həbs dalğasının başladığını elan edib. Hazırda ölkə daxilində internet hələ də məhdudlaşdırılıb, lakin bəzi sakinlər xaricə informasiya ötürə bilirlər. Paytaxt Tehranda küçələr əsasən boşdur və dronlarla hava nəzarəti həyata keçirilir.

İnsan haqları təşkilatları və ictimai qruplar bildirirlər ki, etirazların əvvəlində aktiv olan şəhər və qəsəbələrdə çoxlu sayda hərbi və təhlükəsizlik qüvvələri yerləşdirilib. İran dövlət mediası “terrorçu qrupların üzvləri” hesab edilən minlərlə şəxsin saxlandığını təsdiqləyib.

Etirazlar pik həddə çatanda bəzi nümayişçilər şəhər və rayonların nəzarətini ələ keçirdiklərini iddia etmişdilər.