Danimarkada Qrenlandiya ilə bağlı etiraz aksiyası keçirilib

Danimarkada minlərlə etirazçı ABŞ Prezidenti Donald Trampın Qrenlandiya ilə bağlı planlarına qarşı küçələrə çıxaraq kütləvi aksiyalar keçirib.Bu barədə yerli “Politiken” nəşri məlumat yayıb.

Bildirilib ki, Danimarka və Qrenlandiyanın bir neçə şəhərində eyni vaxtda start götürən aksiyalarda Tramp əleyhinə şüarlar səsləndirilib. “Qrenlandiyadan əllərini çək” (“Hands off Greenland”) şüarı altında keçirilən ən böyük yürüşlərdən biri Danimarkanın ikinci böyük şəhəri olan Orxusda baş tutub.

Aksiyalarda Qrenlandiyanın qırmızı-ağ rəngli “Erfalasorput” adlı bayraqları dalğalandırılıb, “Qrenlandiya satılmır” və “Qrenlandiya qrenlandiyalılar üçündür” kimi şüarlar səsləndirilib.

Etirazlara səbəb Donald Trampın Qrenlandiyanın ABŞ tərəfindən alınması və ya nəzarətə götürülməsi ilə bağlı verdiyi son bəyanatlar olub.