Xamenei: ABŞ-ın İrana hücumu regional müharibəyə yol açacaq

İranın Ali Lideri Ayətullah Əli Xamenei ABŞ-ın İrana qarşı hər hansı hərbi hücumunun regionda genişmiqyaslı münaqişəyə səbəb olacağı barədə xəbərdarlıq edib.

Xamenei bildirib ki, Vaşinqton hərbi əməliyyatlara başlasa, bu, əvvəlki qarşıdurmalardan fərqli olaraq regional müharibə ilə nəticələnəcək.

“Amerikalılar bilməlidirlər ki, əgər müharibəyə başlasalar, bu dəfə regional müharibə olacaq”, –  o qeyd edib.

Ali Lider ABŞ-ın bölgəyə hərbi qüvvə göndərməsinə də toxunaraq, Prezident Donald Trampın təyyarədaşıyan gəmilərin yerləşdirilməsi ilə bağlı açıqlamalarını şərh edib.

“Tramp gəmilər gətirdiyini deyir… İran xalqı belə şeylərdən qorxmayacaq”, - o bildirib.

Bu bəyanat ABŞ-ın Yaxın Şərqə USS Abraham Lincoln təyyarədaşıyan gəmisini göndərməsi və İranın Hörmüz boğazında dəniz təlimlərinə başlaması fonunda səsləndirilib.

Strateji əhəmiyyətə malik Hörmüz boğazının ən dar hissəsində eni təxminən 33 kilometrdir və qlobal neft ticarətinin təxminən 20 faizi bu marşrutdan keçir. İran daha əvvəl də mümkün hərbi hücum halında boğazın bağlanması ilə hədələyib ki, bu da enerji bazarlarında ciddi risk kimi qiymətləndirilir.

Gülnar