İran və Fransa XİN rəhbərləri regionda hərbi eskalasiyanı müzakirə ediblər

İranın xarici işlər naziri Seyid Abbas Əraqçi və Fransanın xarici işlər naziri Jan-Noel Baro telefon danışığı zamanı Yaxın Şərqdə artan hərbi gərginliyi müzakirə ediblər. Bu barədə İran Xarici İşlər Nazirliyinə istinadən məlumat yayılıb.

Məlumata görə, Əraqçi söhbət zamanı ABŞ və İsrailin regionda atdığı addımları qınayıb və gərginliyin artmasına səbəb ola biləcək hərəkətlərdən çəkinməyin vacibliyini vurğulayıb. O bildirib ki, İran öz ərazi bütövlüyü və suverenliyini qorumaq üçün tədbirlər görür.

Telefon danışığında Fransa XİN rəhbəri Jan-Noel Baro Livana qarşı hərbi hücumların dayandırılmasına çağırıb.

Fon məlumatına görə, ABŞ və İran arasında nüvə proqramı üzrə danışıqlarda razılıq əldə olunmadıqdan sonra 28 fevraldan etibarən ABŞ və İsrail İrana hava hücumları həyata keçirməyə başlayıb. Buna cavab olaraq İran həmin gündən İsrailə və ABŞ-ın regiondakı hərbi obyektlərinə raket və dron zərbələri endirib.

Məlumata əsasən, hava hücumlarının ilk günündə İranın Ali Lideri Ayətullah Seyid Əli Xamenei və bir sıra yüksək rütbəli hərbçilər həlak olub. Daha sonra 8 martda Ekspertlər Məclisi Seyid Müctəba Xameneini İranın üçüncü Ali Lideri seçib.

1–5 mart tarixlərində qarşıdurma genişlənərək Yaxın Şərqin bir sıra ölkələrini əhatə edib. ABŞ tərəfinin itkilərinin 8 ölü və 140-dan çox yaralı olduğu bildirilir.

Münaqişə regionun enerji infrastrukturu və dəniz nəqliyyatı üçün riskləri artırıb. Xüsusilə Hörmüz boğazı ətrafında təhlükəsizlik gərginliyi fonunda dünya bazarlarında neft qiymətlərində kəskin artım qeydə alınıb, bir sıra ölkələr isə vətəndaşlarını regionu tərk etməyə çağırıb.