Bağdad hava limanında ABŞ obyektlərinə silsilə hücumlar edilib

İraqın təhlükəsizlik rəsmiləri bildiriblər ki, bazar günü gecə saatlarında Bağdad Beynəlxalq Hava Limanında yerləşən ABŞ-yə məxsus diplomatik və logistika mərkəzi bir neçə dəfə hücuma məruz qalıb.

Anews xəbər verir ki, AFP agentliyinə danışan yüksək vəzifəli təhlükəsizlik mənbəsinin sözlərinə görə, “sübh tezdən raketlər və pilotsuz uçuş aparatları ilə ABŞ-nin yerləşdiyi əraziyə səkkiz ayrı hücum həyata keçirilib”. O əlavə edib ki, bir neçə raket bazanın yaxınlığına düşüb.
Digər təhlükəsizlik rəsmisi isə ən azı altı hücumun baş verdiyini təsdiqləyib. Polis mənbələri hava limanının yaxınlığındakı Bağdad məhəllələrindən birində raket buraxıcı qurğunun aşkar edildiyini bildiriblər.

Məlumata görə, hücumlardan əvvəl şənbə günü ABŞ tərəfi hava limanından bir neçə mərhələli təxliyə həyata keçirib.

ABŞ Dövlət Departamentinin sözçüsü isə bildirib ki, Bağdaddakı diplomatik missiya “çıxmaq əmri verilənədək fəaliyyətini davam etdirəcək”. O vurğulayıb ki, İraqdakı ABŞ komandası əməkdaşların və obyektlərin təhlükəsizliyini təmin etmək üçün bütün zəruri tədbirləri nəzərdən keçirməkdə davam edir.