Maduroya qarşı ittihamlar qüvvədə qalır, məhkəmə xərcləri mübahisəsi davam edir

Venesuelanın sabiq prezidenti Nikolas Maduro və həyat yoldaşı Siliya Floresin işi üzrə Nyu-York federal məhkəməsində keçirilən ikinci iclas başa çatıb.

Məhkəməyə sədrlik edən hakim Elvin Hellerstayn müdafiə tərəfinin vəsatətinə baxmayaraq, Maduronun üzərindən ittihamların götürülməyəcəyini bildirib.

Dinləmələr əsasən müdafiə xərclərinin maliyyələşdirilməsi ilə bağlı mübahisələr üzərində cəmlənib. Maduronun vəkili Barri Pollak bildirib ki, təqsirləndirilən şəxslər hüquqi xidmətləri öz vəsaitləri hesabına ödəyə bilmirlər və bu xərclərin Venesuela hökuməti tərəfindən qarşılanmasına icazə verilməlidir.

Hakim yaxın vaxtlarda ABŞ administrasiyasının Venesuela dövlət vəsaitlərinin müdafiə xərcləri üçün istifadəsinə icazə verib-verməyəcəyi ilə bağlı qərar açıqlayacağını deyib.
İclas təxminən 90 dəqiqə davam edib.

Maduro və Flores ABŞ-da narkotik qaçaqmalçılığı və “narko-terrorizm” ittihamları ilə üzləşir və hər ikisi özlərini təqsirsiz hesab edir. 

ABŞ prezidenti Donald Tramp isə bildirib ki, Maduraya qarşı əlavə ittihamların irəli sürülməsi mümkündür.

Xatırladaq ki, Maduro və həyat yoldaşı yanvarın 3-də ABŞ qüvvələri tərəfindən saxlanılaraq ölkədən çıxarılıb, yanvarın 5-də isə Nyu-Yorkda hakim qarşısına çıxarılaraq ittihamlarla tanış ediliblər.