İran Təhlükəsizlik Şurası: ABŞ müharibədə “tarixi məğlubiyyətə uğrayıb”

İranın Ali Milli Təhlükəsizlik Şurası ABŞ-la qarşıdurmada Vaşinqtonun “danılmaz, tarixi və sarsıdıcı məğlubiyyətə uğradığını” bəyan edib.

Bəyanat Tasnim Xəbər Agentliyi tərəfindən dərc olunub. Mətndə qeyd edilir ki, “düşmən İran xalqına qarşı ədalətsiz və qanunsuz müharibədə məğlub olub”.

Şuranın məlumatına görə, tərəflər arasında əldə olunduğu bildirilən iki həftəlik atəşkəs razılaşması ABŞ qüvvələrinin Yaxın Şərqdəki bazalardan çıxarılmasını, sanksiyaların ləğvini, İranın xaricdəki aktivlərinin dondurulmasının aradan qaldırılmasını və kompensasiya ödənilməsini nəzərdə tutur. Bunun müqabilində Tehran Hörmüz boğazından gəmiçiliyin təhlükəsizliyini təmin etməyi öhdəsinə götürür.

Bundan əvvəl ABŞ prezidenti Donald Tramp İranla iki həftəlik atəşkəs elan etdiyini bildirib və bombardmanların dayandırılmasına razılıq verildiyini açıqlayıb. Onun sözlərinə görə, qərar Pakistanın Baş naziri Şahbaz Şərif və ordu rəhbəri Asim Munir ilə danışıqlardan sonra qəbul olunub.

Tramp həmçinin bildirib ki, atəşkəs razılaşmasının bir hissəsi kimi İran Hörmüz boğazının açıq qalmasına razılıq verib və ABŞ hərbi əməliyyatın bütün məqsədlərinə çatdığını hesab edir. Ağ Ev İsrailin də atəşkəsə qoşulacağını qeyd edib.

 ABŞ və İran arasında münasibətlər uzun illərdir gərgin olaraq qalır və regionda hərbi-siyasi balansa ciddi təsir göstərir. Hörmüz boğazı qlobal enerji daşımalarının mühüm hissəsinin keçdiyi strateji marşrut hesab olunur və burada təhlükəsizliyin təmin olunması beynəlxalq bazarlar üçün kritik əhəmiyyət daşıyır.

Gülnar Nazimqızı