İran səfiri Britaniya XİN-ə çağırılıb

İranın Böyük Britaniyadakı səfiri Seyid Əli Musəvi Böyük Britaniyanın Xarici İşlər Nazirliyinə çağırılıb. Bu barədə “Sky News” məlumat verir.

Görüşdə İranın regiondakı fəaliyyəti və informasiya məkanındakı addımları müzakirə olunub.

Böyük Britaniyanın Yaxın Şərq işləri üzrə naziri Hamiş Falkoner səfirlə görüşdə İran diplomatik nümayəndəliyi ilə bağlı son bəyanat və hərəkətlərin qəbuledilməz olduğunu bildirib.

Britaniya tərəfi İranı həm ölkə daxilində, həm də xaricdə zorakılığı təşviq edə biləcək hər hansı kommunikasiya formasından çəkinməyə çağırıb.

Xarici İşlər Nazirliyi həmçinin qeyd edib ki, London Fars körfəzi regionundakı vəziyyət və digər regional təhlükəsizlik məsələləri ilə əlaqədar İranın fəaliyyətindən narahatlığını bildirməyə davam edəcək.