Putin Pekində Çin lideri ilə görüşüb

Rusiya Prezidenti Vladimir Putin və Çin lideri Si Cinpin Pekindəki Tiananmen Meydanında görüşüb.

 Rusiya prezidentinin Çinə rəsmi səfəri başlayıb.

Putin və Cinpin ilk olaraq məhdud formatda danışıqlar aparıblar. Ardınca nümayəndə heyətlərinin iştirakı ilə geniş tərkibli görüş keçirilib.

Rusiya prezidenti çıxışında Si Cinpini əziz dostu adlandırıb və bir il əvvəl İkinci Dünya Müharibəsində Qələbənin 80 illiyinin qeyd edilməsində necə birlikdə iştirak etdiklərini xatırladıb. O, çinli həmkarını gələn il Rusiyaya səfər etməyə dəvət edib.

"Rusiya və Çin arasında əsrlər boyu davam edən dostluq xaoslu dünyaya dəyərli sabitlik və proqnozlaşdırıla bilənlik gətirir. Əlverişsiz xarici amillərə baxmayaraq, iki ölkə arasında əməkdaşlıq yaxşı temp göstərir. Rusiya və Çin arasında ticarət dövriyyəsi son 25 ildə 30 dəfədən çox artıb", - Putin vurğulayıb.

Putin bildirib ki, Rusiya-Çin münasibətləri artıq dəfələrlə sınaqdan keçib: "Moskva və Pekin arasındakı hərtərəfli tərəfdaşlıq yeni dövrdə dövlətlərarası münasibətlər üçün modelə çevrilib. Rusiya və Çin həm ikitərəfli, həm də beynəlxalq forumlarda əməkdaşlığı inkişaf etdirəcəklər".

Si Cinpin isə çıxışında Çin-Rusiya münasibətlərinin sağlam və sabit inkişafını təşviq etməyin Rusiya Federasiyası və Çin liderləri tərəfindən verilən strateji seçim olduğunu deyib: "Ölkələr Mehriban Qonşuluq Müqaviləsinin uzadılması çərçivəsində əldə edilən razılaşmaları tam şəkildə həyata keçirməlidirlər. Çin və Rusiya iki ölkə arasında qarşılıqlı etimad təməlini daha da möhkəmləndirməli, əməkdaşlığı zənginləşdirməli və dostluğu genişləndirməlidirlər. Çin-Rusiya münasibətləri daha aktiv və sürətli inkişafın yeni mərhələsinə qədəm qoyub".

Görüşün yekununda Vladimir Putin və Si Cinpin Rusiya-Çin münasibətlərinin dərinləşdirilməsi ilə bağlı birgə bəyanat imzalayıblar.