ABŞ Suriyanı terroru dəstəkləyən ölkələr siyahısından çıxara bilər

ABŞ yaxın müddətdə Suriyanın iqtisadi bərpasına dəstək məqsədilə ölkənin terrorizmi dəstəkləyən dövlətlər siyahısından çıxarılmasını təsdiqləyə bilər. Bu barədə ABŞ Dövlət Departamentindəki mənbələrə istinad edən “Al-Monitor” portalı yazıb.

Məlumatda qeyd olunur ki, Suriyanın terrorizmi dəstəkləyən ölkə statusu hazırda onun beynəlxalq iqtisadi sistemə tam inteqrasiyası qarşısında əsas maneələrdən biri hesab edilir. Bu status xarici investorların ölkəyə sərmayə yatırmasını çətinləşdirir, həmçinin müəyyən məhsul növlərinin idxalına məhdudiyyətlər yaradır.

Suriyaya qarşı tətbiq edilən sanksiyaların əhəmiyyətli hissəsi ölkə prezidenti Əhməd əş-Şəraanın 2025-ci ilin may ayında ABŞ prezidenti Donald Trampla keçirdiyi görüşdən sonra aradan qaldırılmışdı.

Portalın məlumatına əsasən, ABŞ Dövlət Departamenti son altı ay ərzində Suriya ilə bağlı maliyyə əməliyyatlarını geniş şəkildə araşdırıb. Yoxlamaların artıq tamamlandığı və qurum daxilində Suriyanın siyahıdan çıxarılması ilə bağlı ümumi razılığın olduğu bəyan edilib.

Aytac