Qətər İranla sülh danışıqlarının aparılması üçün Tehrana xüsusi vasitəçilər göndərib

Qətər ABŞ ilə koordinasiyada İranla danışıqlar aparmaq üçün vasitəçilər qrupunu Tehrana göndərib.Bu barədə Reuters mənbələrə istinadən məlumat yayıb.

Məlumata əsasən, nümayəndə heyətinin məqsədi İranla mümkün sülh sazişi üzrə razılaşdırılmamış məsələlərin həllinə yardım etməkdir.

Mənbələrin bildirdiyinə görə, Qətər daha əvvəl Qəzza zolağındakı münaqişə də daxil olmaqla bir sıra regional proseslərdə vasitəçi kimi çıxış edib. Lakin İranın Qətər ərazisinə raket və dron zərbələri endirməsindən sonra Doha Tehranla bağlı vasitəçilik fəaliyyətindən geri çəkilmişdi.

Məlumatda həmçinin qeyd olunur ki, Türkiyə, Misir və Pakistan da prosesdə dolayı diplomatik rol oynayır. ABŞ və İran arasında müzakirə olunan ilkin razılaşma layihəsində atəşkəsin tam təmin olunması, qarşılıqlı hücumların dayandırılması və Hörmüz boğazında gəmiçiliyin sərbəstliyinin qorunması nəzərdə tutulur.