Şahbaz Şərif Çində rəsmi səfərdədir

Pakistanın Baş naziri Şahbaz Şərif Çinə rəsmi səfərə gedib.

Pakistan Baş nazirinin dəftərxanasının məlumatına görə, səfər çərçivəsində Çin rəsmiləri və şirkət rəhbərləri ilə bir sıra görüşlər planlaşdırılıb.

Pakistan nümayəndə heyətinə xarici işlər naziri Məhəmməd İshaq Dar da daxildir. Dar “X” platformasında bildirib ki, Şərif Xançjouda Çjetszyan əyalətinin partiya rəhbərliyi ilə görüşəcək.

Baş nazirin həmçinin Pakistan və Çin şirkətləri arasında əməkdaşlığın genişləndirilməsinə həsr olunmuş biznes forumda iştirakı nəzərdə tutulur. Səfər zamanı bir sıra saziş və anlaşma memorandumlarının imzalanmasının planlaşdırıldığı bildirilib.

Rəsmi məlumata görə, Şərif iri Çin şirkətlərinin rəhbərləri ilə də görüşəcək. Baş nazirin Çinə səfəri mayın 26-dək davam edəcək.