Əlcəzair prezidenti Əlcəzair-Azərbaycan enerji sazişini təsdiqləyib

Əlcəzair Prezidenti Əbdülməcid Təbbun Azərbaycanla enerji sahəsində əməkdaşlığın genişləndirilməsini nəzərdə tutan strateji sənədi təsdiqləyib.

Yerli medianın məlumatına görə, sənəd iki ölkə arasında neft, təbii qaz, neft-kimya sənayesi və bərpa olunan enerji sahələrində əməkdaşlığın inkişafına yönəlmiş memorandumu əhatə edir.

Memorandum enerji sektorunda birgə fəaliyyət üçün hüquqi və institusional çərçivə yaradır. Sənəd neft və qaz yataqlarının kəşfiyyatı, hasilatı və emalı, eləcə də enerji məhsullarının nəqli və ixracı sahələrində əməkdaşlığın genişləndirilməsini nəzərdə tutur. Bu əməkdaşlıq həm quru, həm də dəniz layihələrini əhatə edir.

Razılaşmaya əsasən, Azərbaycanın dövlət enerji şirkəti SOCAR Əlcəzairin İtaliyadakı emal müəssisələrinə uzunmüddətli əsaslarla xam neft tədarük edə bilər. Tərəflər bunun enerji ticarətinin həcminin artırılmasına töhfə verəcəyini bildirirlər.

Sənəd bərpa olunan enerji sahəsində əməkdaşlığı da əhatə edir. Prioritet istiqamətlər arasında hidrogen texnologiyalarının inkişafı, enerji və nəqliyyat infrastrukturu, həmçinin mütəxəssis hazırlığı yer alır.

Memorandum 2022-ci ilin noyabrında imzalanıb və beş il müddətinə qüvvədə qalacaq. Tərəflərdən heç biri müqaviləyə xitam vermədiyi təqdirdə, sənədin müddəti avtomatik uzadılacaq.