İran XİN region ölkələrinə xəbərdarlıq edib

İranın xarici işlər naziri Abbas Əraqçi bildirib ki, ABŞ-nin region ölkələrində yerləşən hərbi bazaları İrana qarşı hücumlarda istifadə olunarsa, həmin obyektlər Tehran üçün qanuni hədəfə çevriləcək.

"Tasnim" agentliyinin məlumatına görə, Əraqçi deyib ki, İran bu barədə region ölkələrini əvvəlcədən xəbərdar edib.

"ABŞ bazaları İrana qarşı təcavüzdə iştirak edərsə, onlar bizim qanuni hədəfimiz olacaq", – nazir bildirib.

Əraqçinin sözlərinə görə, İranın mümkün cavab tədbirləri region ölkələrinin ərazisinə deyil, ABŞ-yə məxsus hərbi obyektlərə yönələcək.

O əlavə edib ki, Tehran bu məsələ ilə bağlı region ölkələri, o cümlədən Səudiyyə Ərəbistanı ilə təmasları davam etdirib.

Nazir qeyd edib ki, regionun bir sıra ölkələri öz əraziləri və hava məkanlarının İrana qarşı istifadə olunmasına qarşı çıxsa da, ABŞ həmin imkanlardan istifadə edib.