Pekin Böyük Britaniyadan Çin şirkətlərinə qarşı sanksiyaların ləğvini tələb edib

Çin Böyük Britaniyanın Rusiyaya qarşı son sanksiyalar paketi çərçivəsində bəzi Çin şirkətlərinə tətbiq etdiyi məhdudiyyətlərə etiraz edib.Bu barədə Çinin Böyük Britaniyadakı səfirliyi bəyanat yayıb.

Bildirilib ki, Pekin beynəlxalq hüquqa əsaslanmayan və Çin şirkətlərinin qanuni maraqlarına zərər vurduğunu hesab etdiyi birtərəfli sanksiyalara qarşıdır. Səfirlik məsələ ilə bağlı Britaniya hökumətinə etirazını çatdırdığını qeyd edib.

Bəyanata görə, Çin Ukrayna üzrə sülh danışıqlarını dəstəkləyir və ikili təyinatlı məhsulların ixracına ciddi nəzarət edir. Pekin Londonu qərarına yenidən baxmağa və Çin şirkətlərinə qarşı tətbiq olunan sanksiyaları ləğv etməyə çağırıb.

Böyük Britaniya iyunun 16-da Rusiyanın hərbi və maliyyə şəbəkələrini hədəf alan yeni sanksiyalar elan edib. Paket çərçivəsində 32 təşkilat və 11 fiziki şəxs siyahıya daxil edilib, məhdudiyyətlər Çin, Türkiyə, Tailand, Nigeriya və Laosdan olan bir sıra şirkətləri də əhatə edib.