KTMT baş katibi: Ermənistan təşkilatın fəaliyyətində faktiki iştirak etmir

Ermənistan faktiki olaraq Kollektiv Təhlükəsizlik Müqaviləsi Təşkilatının (KTMT) fəaliyyətində iştirak etmir və artıq üç ildir ki, üzvlük haqqını ödəmir. Bu barədə KTMT-nin baş katibi Taatbek Masadikov TASS agentliyinə müsahibəsində bildirib.

“Ermənistan artıq üçüncü ildir ki, üzvlük haqqını ödəmir. De-fakto, demək olar ki, heç bir iştirakı yoxdur, de-yure isə KTMT-nin tamhüquqlu üzvü olaraq qalır. Lakin qərar, əlbəttə ki, erməni xalqına və Ermənistan rəhbərliyinə məxsusdur”, – Masadikov deyib.

Onun sözlərinə görə, təşkilata üzv dövlətlər Ermənistanın üzvlük haqqını ödəməməsi səbəbindən onun statusu və səsvermə hüququ ilə bağlı məsələni müzakirə edirlər.

“Bəli, bu məsələ müzakirə olunur. Son olaraq Kazanda Xarici İşlər Nazirləri Şurasının iclası keçirildi və nazirlər bu məsələni ətraflı müzakirə etdilər”, – KTMT baş katibi əlavə edib.

Aytac Zeynalova