Dünya sukuk bazarı on ildə 5 dəfə böyüb

Qlobal sukuk bazarının həcmi 2030-cu ilə qədər 1,8 trilyon dollara çata bilər. Bu barədə Malayziya Mərkəzi Bankının müavini Adnan Zeylani Zahid İslam İnkişaf Bankı (İİB) Qrupunun 51-ci İllik Toplantıları çərçivəsində keçirilən tədbirdə bildirib.

Onun sözlərinə görə, hazırda dövriyyədə olan sukukların həcmi 1 trilyon dolları ötüb və son on ildə təxminən beş dəfə artıb. O qeyd edib ki, sukuklar artıq İslam maliyyəsinin niş seqmenti deyil, qlobal maliyyə bazarlarının mühüm maliyyələşmə alətinə çevrilib.

O vurğulayıb ki, 2040-cı ilə qədər 15 trilyon dollar həcmində qiymətləndirilən qlobal infrastruktur maliyyələşməsi kəsiri fonunda sukuklar uzunmüddətli layihələrin maliyyələşdirilməsində mühüm rol oynaya bilər.

Onun sözlərinə görə, sukuklar vasitəsilə bərpa olunan enerji, logistika, rəqəmsal rabitə və nəqliyyat infrastrukturu layihələri maliyyələşdirilir. Malayziyada isə 2025-ci ildə sukuklar hesabına real iqtisadiyyata 34 milyard dollardan çox investisiya yönəldilib.

Aytac Zeynalova